Bütün Dünyada Apple Məhsullarının Qiymətləri Qalxa Bilər!

ABŞ prezidenti Donald Tramp ölkəyə gətirilən məhsullara yeni gömrük vergiləri tətbiq ediləcəyini açıqlayıb. Bu qərar, Apple məhsullarının qiymətində artıma səbəb ola bilər.

Tramp vəzifəyə başladığı gündən bəri xarici ölkələrdən idxal olunan məhsullara əlavə vergi qoyulacağını vurğulayırdı. Dünən keçirilən rəsmi mətbuat konfransında isə bu məsələyə dair bütün detalları açıqladı. Bir çox ölkədən edilən idxalata ciddi gömrük rüsumları tətbiq ediləcək və bu, təbii ki, Apple kimi texnologiya nəhənglərini də əhatə edəcək.

Trampın vergi tətbiq etdiyi ölkələr arasında Apple-ın təchizat zəncirində mühüm rolu olan bölgələr də yer alır. Bu isə Apple məhsullarının qiymətinin yüksəlməsi ehtimalını artırır və biz istifadəçilərə də birbaşa təsir göstərə bilər.

Apple məhsullarının qiyməti arta bilər

Trampın qərarına əsasən, ABŞ-a edilən bütün idxalata %10 əlavə gömrük vergisi tətbiq olunacaq. Bu dəyişiklik 5 aprel tarixindən qüvvəyə minəcək. Eyni zamanda, bəzi ölkələrə qarşı əlavə tariflər də müəyyən edilib və Apple-ın əsas təchizat bölgələri də bu siyahıya daxildir.

Məsələn, Çin üçün tətbiq ediləcək ümumi vergi %54-ə qədər yüksələ bilər. Bu rəqəm yanvarda tətbiq olunan %20-lik vergi və yeni elan edilən %34-lük qarşılıqlı tarifin birləşməsi nəticəsində yaranır. Bildirilir ki, bu yeni tariflər 9 aprel tarixindən qüvvəyə minəcək.

Hazırda istifadə etdiyimiz iPhone-ların əksəriyyəti Çində istehsal olunur. Yəni, ABŞ-da qiymətlərin artması, bütün dünyada, o cümlədən Azərbaycanda da qiymət artımı ilə nəticələnə bilər. Bundan əlavə, Apple şirkətinin səhmləri bu açıqlamadan sonra təxminən %7 dəyər itirib.

Apple son illərdə istehsalı Çindən başqa ölkələrə keçirmək istiqamətində addımlar atır. ABŞ-Çin ticarət münaqişəsi və COVID-19 pandemiyası fonunda şirkət istehsal prosesini Vyetnam kimi ölkələrə köçürməyə başlamışdı. Hal-hazırda AirPods, Apple Watch və MacBook modelləri bu ölkədə istehsal olunur.

Lakin yalnız Çin deyil, digər ölkələr də yeni gömrük rüsumlarından təsirlənir. Vyetnam üçün %46, Hindistan üçün təxminən %26, Malayziya üçün isə %24 həcmində vergi nəzərdə tutulur. Bütün bu göstəricilər Apple-ın ciddi vergi təzyiqi ilə üzləşdiyini göstərir və nəticədə məhsul qiymətlərində artım qaçılmaz ola bilər.

Əgər vəziyyət bu şəkildə davam edərsə, Apple üçün mənfi nəticələr qaçınılmaz olacaq və daha yüksək qiymətlərlə qarşılaşa bilərik. Nə baş verəcəyini isə zaman göstərəcək.

Texnologiyadan xəbərdar olmaq üçün Telsat Xəbərləri izləməyi unutmayın.