Apple indiyə qədərki ən sürətli prosessoru olan M3 Ultra-nı təqdim etdi

Apple, bu günə qədər hazırladığı ən güclü çipi olan M3 Ultra-nı təqdim etdi. 32 nüvəli bu prosessor  təkmilləşdirilmiş CPU, GPU və süni intellekt performansı ilə seçilir.

32 nüvəli performans nəhəngi

M3 Ultra, 24 yüksək performanslı nüvə və 8 səmərəlilik nüvəsi ilə 32 nüvəli bir prosessordur. Apple-ın məlumatına görə, M3 Ultra, M2 Ultra -dan 1.5 dəfə, M1 Ultra-dan isə 1.8 dəfə daha güclüdür. 80 nüvəli GPU, M2 Ultra-dan 2 dəfə, M1 Ultra-dan isə 2.6 dəfə daha yüksək qrafik performansı təqdim edir.

Yeni qrafik arxitekturası dinamik keşləmə, aparat səviyyəsində sürətlənmiş şəbəkə kölgələmə və şüa izləmə (ray tracing) kimi xüsusiyyətlərə malikdir.

Süni intellekt və maşın öyrənmə performansı

M3 Ultra, 32 nüvəli Neural Engine, 800 GB/s-dən çox yaddaş ötürmə qabiliyyəti ilə böyük dil modellərini (LLM)birbaşa cihaz üzərində işlədə bilir.

512 GB RAM dəstəyi

M3 Ultra 96 GB-dan 512 GB-a qədər RAM konfiqurasiyasını dəstəkləyir və 3D modelləşdirmə, vizual effektlər və süni intellekt  kimi ağır iş yüklərini asanlıqla idarə edə bilir.

Thunderbolt 5 və UltraFusion texnologiyası

Yeni Thunderbolt 5, 120 GB/s-ə qədər məlumat ötürmə sürəti ilə Thunderbolt 4-dən 2 dəfə daha güclüdür. UltraFusion texnologiyası isə iki M3 Max çipini 10,000-dən çox siqnalla birləşdirərək 2.5 TB/s-lik bant genişliyi təmin edir.

Media və ekran dəstəyi

M3 Ultra-nın H.264, HEVC və ProRes mühərriki,  22 ədəd 8K ProRes 422 videonu eyni anda oynada bilir. Ekran texnologiyası isə 8 ədəd Pro Display XDR monitora görüntü verə bilir.